" Bisalu ya kupona tasalama inki mutindu, mpe inki kisalu ya ba mbangi mpe ya bitadi na kati ya bureaux ya vote ? "

” Bisalu ya kupona tasalama inki mutindu, mpe inki kisalu ya ba mbangi mpe ya bitadi na kati ya bureaux ya vote ? ”

* Ya fwana ntete beto zabisa ti,kupona ikele mutindu ya kupesa ndinga ya konso muntu,fwana kupesa dibanza na yandi na dikambu songolo. Yau ikele kima ina kangu ya insi to kimvuka ya bantu ke monisa lukanu na bau na kupona.Nsiku ya kupona 06 / 006 du 09 mars 2006 me tala bisalu ya kupona mfumu ya insi, ba ntumwa ya kangu,na ba mbanza,ti na mabwala na insi ya mvimba République Démocratique ya Congo, ke tuba ti, kupona fwana salama na muntu yandi mosi, yandi lenda tinda muntu ya kaka ve, yandi lenda piya kutinda yau na mukanda ve. Sambu na kuzaba mutindu yau ta lutila,yau kele pete.Nge kuma na bureau ya vote,na kielo nge ke kuta ba assesseurs bau ta tala kana kumbu na nge kele na liste ya bantu me sonikaka mazina sambu na kupona na bureau ya vote ina.Na nima président ya bureau ya vote ta pesa nge bulletin ya vote.Vana nge ke kwenda na kisika ya kuswama ba ke bokila isoloir kuna nge ta vanda nge mosi muntu mosi ve ta zaba nani nge me pona. Nge ta pona na kutula kidimbu ya musapi na nge na kisika kele kizizi mpe kumbu ya muntu nge ke zola kupona, nge ke konika bulletin ya vote na nge na mpila ti ,muntu kumona ve nani nge me pona,nge ke basika na kisika ya kuswama,nge ke pusana kisika kele urne,na ntwala ya ba mbangi, nge ke tula yau na kati ya urne. Na nima nge ke tula diboko to signature na liste ya bantu fwana kupona.Kana nge zaba kusonika ve, nge ke tula diaka kidimbu na musapi na nge.Na ntwala ya kupesa muponi bulletin na yandi ya vote, président ya bureau ya vote ke tula tinda to encre indélébile na musapi ya muntu me katuuka kupona.

” beto lenda zaba na nima ya kupona inki ta landa to inki ta salama ? ”

* Kulandana na nsiku ya kupona,kana bisalu ya kupona me manisa,bau ke banda bisalu ya kutanga matonzi to kusala ina ba ke bokila dépouillement yau ikele bisalu me tala kutanga ba bulletin ya vote sambu na kuzaba mvutu ya bisalu ya kupona.Kutanga ke salama na ntwala ya ba mbangi mpe bitadi ya insi na ba nzenza.

” Banani ina ba mbangi mpe bitadi, zabisa beto kisalu na bau ikele inki na kati ya bureaux ya vote ? ”

·* Mbangi kele mwana nionso ya insi congo ina me tindama na candidat indépendant,kimvuka ya politique to mvukani ya bimvuka ya politique, bau me kuzua inswa katuka na Commission électorale indépendante sambu bau monana na bisalu ya kupona. Bau ke tula maboko na mukanda ina ba ke bokila procès-verbal bau ke sonika mambu nionso mutindu yau me luta mbote to imbi, ina tambulaka mbote mpe ina kwendilaka ve.
Kitadi kele mwana ya insi to nzenza me tindama na kimvuka ya bana ya insi to ya ba nzenza, yandi me ndimama na Commission électorale indépendante sambu na kutala, kulandila mpe kumonana na bisalu ya kupona nionso.
Sambu na kisalu na yandi,nsiku ya kupona ke tuba ti, ba mbangi mpe bitadi to ba observateurs bau ke landila mambu nionso ke luta na bisalu ya kupona ti na tangu ba ke ke tanga ba bulletin ya vote to kusala ina ba ke bokila dépouillement. Mutindu bau ikele binama ya bureau ya vote ve, bau ikele na inswa ve,ya kumonana na kisika ba ke pesa ba mvutu ya nsuka ya bisalu ya kupona, ba lenda yufusa mpe mabanza na bau ve.
Kansi bau ikele na inswa ya kulomba ti ba sonika ba mambu nionson ina tambulaka mpe ina tambulaka ve, bau tanga yau na ntwala ti bau kanga yau.Bika beto zabisa beno ti ba mbangi ke zua lufutu na bau na bantu ponaka bau na kisalu ya kibangi .Na ndambu na bau bitadi,lufutu na bau ke katuka ve na mbula matadi ya Congo ata na Commission électorale indépendante mpe ve. Kansi bau ta kengila bau mbote.Kana bitadi kele ve na bureau ya vote, vote ta salama na mutindu ya kufwanakana. Ba lenda ata fioti ve kufwa bisalu ya vote sambu na bitadi me kondwa..

Texte de SAMUEL KATSHAKrnOndes CourtesrnTél. : 00243998909787rnExt. : 6961rnE-mail : [email protected] [email protected] MichelinernJournaliste Equipe électoralrnRadio Okapi KinshasarnExt. : 6169rnTel : 00243998186793