- Na bansangu yayi, beto ta zabisa inki ya ke na kuluta na Kivu ya zulu, mingi na yayi me tadila bumbuanzi ya M23 me kotisaka kuna.
- Na bizunga, ntete na Sankuru, wapi nsangu kele ya kukwamina ya kimbefo ya Monkey pox. Bantu nkama mosi na kumi na uvua me baka yau.
- Nsangu yankaka na suka yayi, ya kele ya kumata ya ntalu ya litrre ya Essence, mingi na mbanza Bunia, bwala kimfumu ya kizunga ya Ituri.
- GOMA: Na kizunga ya Kivu ya zulu, ngemba me vutuka, tuka kilumbu ya sabala me luta na bisika ya kunuana vandaka ke luta, mingi na Territoire ya Rutshuru mpe ya Nyiragongo. Bimpumbulu ya M23 ya vandaka na Kibumba, na Territoire ya Nyiragongo, ya vanda na Kanombe, na Territoire ya Rutshuru tinaka na ndambu ya ndilu ya nsi ya Rwanda.
- GENERAL EKENGE: Kaka tuka kilumbu yina ya sabala dionga ya bandinga ke na kuluta na kati ya makesa ya nsi na beto mpe makesa ya Rwanda, mingi na yayi me tadila makesa zole ya nsi ya Rwanda ya ba kangaka na Territoire ya Rutshuru. Na kulanda luzayisu ya Fardc ya basikaka na nkokila ya kilumbu yina ya sabala me luta, kinati ndinga ya mfumu ya kizunga tendulaka ti makesa nionso zole yina kangamaka na Biruma, Territoire de Rutshuru.
- BUTEMBO: Mpe na mbanza Butembo, binati matoma vutukaka na kutambula mazono na nzila Butembo-Goma. Nionso yayi na nima ya kunuana na kati ya makesa ya nsi mpe bimpumbulu ya M23, wapi kutambula kangamaka na kati ya Kiwanja-Goma.
/sites/default/files/2022-05/3105022-p-k-journalkikongomatin-00.mp3
