BENI : Beto yantika bansangu yayi na Kivu ya zulu, samu na kuzabisa ti difuda mosi na nkama nsambwadi kele ntalu ya makesa ya nsi ya Ouganda ya me kuma awa na ntoto na beto samu na kunuanisa bimpumbulu ya ba Adf, kintwadi ti Fardc.
BUNIA : Mpe na kizunga ya Ituri, nsangu me zabana ti kele ti kiteso ya bimvuka kumi ya mvimba ya bimpumbulu ya ke na kudondaka kuna. Na kati na yau, beto lenda kutanga Urdpc mpe Codeco. Bimpumbulu yayi kele na babwala mingi ya Territoire ya Djugu, mpe na ndambu ya ba Territoire bonso Irumu, bwela diaka Mahagi.
BUTEMBO : Mpe na mbanza Butembo, baleke talaka Diambu yayi ya kukonda ngemba na Territoire ya Beni, mpe na kizunga ya Ituri, mpe inki ya kusala samu na kuvutuka ya ngemba ya kieleka, mingi na ntangu yayi ya makesa ya nsi ya Ouganda me kwisa kupesa Fardc maboko.
BUKAVU: Mambu ya politiki ke na kwenda diaka ve mbote na kizunga ya Kivu ya nsi. Nionso yayi tuka kukatuka ya mfumu ya kizunga na lukanu ya bantumwa ya nkangu ya kizunga yayi, na kilumbu ya zole ya ngonda me luta.
ASSEMBLEE NATIONALE: Ya me bikala kaka bilumbu uvua samu na kukuma na nsuka ya lukutakanu ya ngonda ya uvua na ndambu ya nzo ya kinzonzi. Kiadi, bamambu mingi ya bantumwa yayi ya nkangu bongisaka me tubama ntete ve. Ya kele mingi yayi ya kusosa kuzaba inki mutindu ya luyalu sadilaka mbongo ya mvula me luta, mpe yayi ya yau ta sadila na yau na mvula ke kwisa.
LOMAMI: Kizunga ya Lomami, samu na kumanisa bansangu ya suka yayi ya ndinga Kikongo, ntalu ya masangu me mata mingi na Kabinda. Ekolo ya vandaka ke tekama na mposo me luta na mafunda nkama tanu ya Fc, ekolo yina ya ba kilo tatu me kuma bubu yayi kutekama na mafunda iya ya Fc, mafunda iya na nkama tanu, to diaka na mafunda nkama tanu ya Fc kuna mbanza Kabinda. Mpe na Hallo Hallo ya nkundi na beto Esther Ndalafina, mbuta Jean Kikangala Kibambe, ya kele ntwadisi ya nzo ya bisalu ya Fec kuna na Kabinda mekaka na kutendula kumata yina ya ntalu.
/sites/default/files/2021-12/06122021-p-k-journalkikongomatin-00.mp3
