- BENI : Nsangu ya kiese, Oms me zabisa ti kimbefo ya Ebola ya vutukaka diaka na ntoto ya Beni me mana.
- GOMA : Dibanza ya kuvukana ya bapulusi ya nsi ya Rwanda mpe ya nsi na beto, bwela diaka ti bisalu ya bapulusi ya bansi ya dizanga ya nene ya nsi na beto me basisa maswana ya ngolo na mbanza Goma.
- BUNIA : Na Territoire ya Mambassa na kizunga ya Ituri, balongoki nkama tatu na makumi iya ke tangaka diaka ve. Kikuma, baludi ya banzo na bau bwaka ti mupepe.
- KINSHASA : Bana ya nsi na beto ya vandaka ke kwenda na mbanza, kansi ya ba kangaka ti kimbefo ya Corona na mbanza Addis Abeba na nsi ya Ethiopie, ta bika bwala kimfumu yina ya Ethioie kaka ti kilumbu ya ba ta tesa diaka menga na bau samu na kuzaba kana ti kimbefo yayi ya Corona kele diaka ve na nitu.
- BUNIA : Mpe na kutuba ya mama Bintou Keita, manaka nionso ya Onu ya ke salaka awa na ntoto ya Kongo Kinshasa, me ndimamaka na mbula matadi ya nsi.
- KISANGANI : Na kizunga ya Uele ya nsi, bimvuka ya nkangu me lomba kubasika na buloko ya Buta ya bantu na yau tatu ya me lungisa bubu yayi bangonda sambanu. Ba kangaka bau na ntangu ya kunuana salamaka ti bapulusi, na ntangu ya ba kwendaka kusadisa bantu mosi ya bisalu ya lukengelo vandaka ke mwesa mpasi.
- BUNIA : Beto kwenda na kizunga ya Ituri, mingi na Territoire ya Mambassa wapi kiteso ya bana nkama tatu na makumi iya ya Ecole Primaire Okapi ke na kutanga na mpasi na bangonda zole yayi. Kikuma, mupepe ya ngolo katulaka baludi ya banzonkanda na bau.
- GOMA: Beto manisa na Kivu ya zulu, wapi bantu ya ke salaka malanga ke na kumona mpasi na bitadi ya mutindu na mutindu; kansi ya me zabana ve na ndambu ya Mbula matadi. Kifu ya Mbula matadi fwete kumanisa.
/sites/default/files/2021-12/17122021-p-k-journalkikongomatin-00_bon.mp3
