- KINSHASA : Kiteso ya mafunda nsambwadi, kele mingi ntalu ya bamambu ya kukonda kuzitisa banswa ya nkangu ya salamaka awa na nsi na beto na mvula me luta. Nionso yayi me zabana na kubasika ya mukanda ya nzo ya Onu ya ke landilaka mambu ya banswa ya bantu awa na nsi na beto.
- GOMA : Muyibi ya mbongo, bantwadisi nana ya makesa ya nsi na beto kele na ntwala ya bazuzi na kizunga ya Kivu ya zulu.
- BUTEMBO : Na mbanza Bitembo, ntalu ya Essence mpe ya kuzieta na matoma me mata mingi.
- GOMA : Beto bikala kaka kuna na Kivu ya zulu, wapi ngemba me vutuka na bwala Rugari mpe Nyesisi, na Groupement ya Rugari bwela diaka ya Kisigari, na Territoire ya Rutshuru. Kuna, tuka kintete ya mposo yayi, mvita ya ngolo lutaka na kati ya makesa ya nsi mpe bimpumbulu ya M23, wapi bankama ya bantu tinaka.
- MATADI : Na kizunga ya Kongo central, bamambu ya mbi me vutuka diaka mingi na mbanza Muanda. Na kulanda bimbangi ya nkangu, kaka na nima ya ba sabala tatu, ba Kuluna yibaka na babwala mingi. Mpe na ntendula nandi na baninga ya Radio na beno ya Ngemba, mfumu ya Territoire ya Muanda me zabisa ti makutakanu ya mutindu na mutindu ke na kusimba samu na kutala inki mutindu ya kumanisa bamambu nionso yina ya mbi.
- BUKAVU : Kivu ya nsi. Nzila katuka mbanza Bukavu ti na kumona Kamanyola ke zola kuzengana, mingi na ndambu Ngomo. Nzila yina kele mfunu mingi samu na bisalu ya kimvuama, mingi katuka kizunga ya Kivu ya nsi ti na Katanga, na kuluta na Tanganyika. Mpe na ntangu yayi ya beto ke na kutuba, Office des routes ke na kusala nionso samu ti matoma kulanda na kuluta.
- KISANGANI : Beto manisa na kizunga ya Uélé ya nsi, wapi ya Rubi na nzadi ya kaka ya Rudi na kukota ya mbanza Buta ke zola kubwa. Bantu ke na kuyiba mabende ; ya me lunga bubu yayi sabala mosi. Na kufunda ya muntu mosi, bapulusi kanga leke mosi.
/sites/default/files/2022-01/2801022-p-k-journalkikongomatin-00.mp3
