- KINSHASA : Kele bubu yayi, kitatu, ya nzo ya nene ya masonga ya makesa ke kota na nzila ya nsuka na yayi me tadila kusamba ya bantu ya me tangamaka na lufwa ya Floribert Chebeya mpe Fidele Bazana.
- BUTEMBO : Na Kivu ya zulu, bimvuka ya nkangu ya kele na Kamandi ke bokuta mingi na mutindu ya bankengi ya ICCN ya kele na Ndwali na bukula ya dizanga ya Edouard na Territoire ya Lubero me kanga kiteso ya bantu ya malanga makumi zole.
- MBANDAKA : Kizunga ya Ubangi ya zulu ; kuna kele kubokuta ya bimvuka ya nkangu na kutala luzingu ya mpasi ya kele na buloko ya nene ya mbanza Gbadolite.
- KINDU : Na kizunga ya Maniema, tuka ngonda me luta, kima mosi ke pesamaka diaka ve na buloko ya mbanza Kindu. Nsangu ya ntwadisi ya nzo yina ya buloko me pesa na bansinga ya Radio na beno ya Ngemba. Diaka, bankisi ke pesamaka ve na bantu ya buloko.
- BUKAVU: Na Kivu ya nsi, nsangu kele mpe ya buloko ya Kamituga na Territoire ya Mwenga wapi luzingu kuna ya bantu ya kele na kati kele ya mpasi. Nsangu ya me pesama na kimvuka mosi ya ke landilaka mambu ya banswa ya bantu, na nima ya kusala nzietelo kuna.
- MBUJI-MAYI : Nsangu ya kiese samu na nkangu ya kizunga ya Kasai Oriental wapi ntalu ya litre ya essence na mbanza Mbuji Mayi. Litre yayi me kuma kutekama bubu yayi na mafunda tanu na nkama tanu ya Fc na ndambu ya ba Kadhafi na sika ya mafunda nsambwadi na mposo me luta.
- GOMA : Kansi na Kivu ya zulu ; ya vanda Essence to diaka Gasoil ke na kumonana miNgi ve na bisika yankaka ya yau ke tekamaka na mbanza Goma. Na ndambu ya ke monana, ntalu me mata.
- LUBUMBASHI : Banzoko ya katukaka na mfinda ya nsiku ya Upemba me bebisa malanga mingi ya bantu ya groupement ya Katala mpe ya Musanza na Territoire ya Bukama, mingi na kizunga ya Lomami ya zulu. Mpe bisadi ya ICCN ya kwendaka kukula banzoko yina vutukaka mazuzi na Luena.
/sites/default/files/2022-02/16022-p-k-journalkikongomatin-00.mp3
