- KINSHASA: Nsamukila ya Coronavirus aw ana nsi na beto kele ya ngolo. Tuka luyantiku ya ngonda yayi, kiteso ya bantu difunda mosi me baka yau. Nsangu ya me pesama na munganga Jean Jacques Muyembe Tamfum.
- BUNIA : Beto ta tubila mpe nzietelo ya mama Bintou Keita, mfumu ya Monusco salaka na Roe, bwala mosi ya ba me tulaka bantu ya tinaka mvita na Territoire ya Djugu.
- BANDUNDU : Kizunga ya Mai-Ndombe, bisumbula ke na kusalama mingi bilumbu yayi na nzadi ya Kongo, mpe na dizanga ya Mai-Ndombe, mpe beto landa ndinga ya mbuta ya ke na kula bilumbu yayi na sika ya mfumu ya kizunga.
- LUBUMBASHI : Ya kieleka, nsamukila ya kimbefo yayi ke na kumonana mpe na mbanza Lubumbashi. Kikuma ya nene ya kumata ya ntalu ya bambefo yayi kele kutita ya bantu ya ke zola ve kuba mangwele. Nsamukila yayi me kuma mpe na kizunga ya Lualaba.
- GOMA : « Kununga dinaka ya makumi uvua na tanu, katuka awa ti na mvula mafunda zole na makumi tatu mingi na yayi me tadila kunuanisa kimbefo ya Sida, na nsungi yayi ya nsamukila ya Coronavirus, mpe ya bimbefo yankaka diaka ya nsamukila, kukonda ya nsadisa na ndambu ya bantu ya me tinaka mvita », tala ntu ya dilongi ya lukutaka yayi ya ke na kusimbama na mbanza Goma.
- BUNIA DJUGU : Mpe na ndambu na bau, bantu yina ya tinaka bumvuanzi ya bimpumbulu ya Codeco me sepela mingi na mutindu ya makesa ya Monusco ke na kutanina bau.
- KINSHASA : Tuka luyantiku ya mvula yayi ya mafunda zole na makumi zole na mosi, nzo ya Onu ya ke landilaka mambu ya nswa ya bantu me pesa ntalu ya bantu mafunda sambanu na nkama iya na makumi sambanu na uvua ya bakaka bampasi awa na nsi na beto.
- MBUJI-MAYI : Kizunga ya Lomami samu na kumanisa, kiamvu ya Luilu ya ke vukisaka bwala Luputa mpe Mwene me beba ngolo. Kansi na nsangu ya beto kele na yau, ba me bongisaka kiamvu yina mbala tatu ya mvimba.
/sites/default/files/2021-12/1612021-p-k-journalkikongomatin-00.mp3
